Mbinu 10 za kisasa za kutangaza biashara yako

Kama uliwahi kuandaa tangazo na kulitoa kwa watu ukijaribu kutafuta wateja, mwitikio ukawa kidogo sana kuliko hata mategemeo ya kawaida, kuna uwezekano ulifanya uchaguzi usio sahihi wa tangazo lililotakiwa kutumika au ulilenga watu ambao sio wadau wa biashara au huduma yako.

Mfano, unauza madela unazungukia vijiwe au maeneo wanayoishi na kufanyia kazi wanaume, ukitarajia wanaume ndio wanunue wapelekee wake zao, hapo utatumia muda mwingi lakini mauzo yatakuwa kidogo.

Kwa nini usifikie wanawake watumiaji na walihitaji wenyewe kabisa wa madela na ukauza kwa kiwango kikubwa?!

Katika biashara ndogo au kubwa ukiweza kubaini walengwa wa biashara au huduma yako, na ukatumia njia nzuri ya kufikisha huduma yako, utafanikiwa katika biashara.

Hapa nimekuandikia njia 10 za kisasa za kutangaza biashara yako....

 1.Jitambulishe/Watambulishe wengine– Wenzetu katika lugha ya Kiingereza wanaita kitu hiki “networking”. Kwa bahati mbaya, Kiswahili hakina neno mbadala la moja kwa moja kuhusu “networking” hii. Kwa kifupi, ni kwamba ukiwa na biashara, kila unayekutana naye anaweza kuwa mteja wako.Jitambulishe bila aibu.Mjue na yeye akujue, mwambie unachokifanya(biashara yako).Pia usisahau marafiki zako.Je marafiki zako wanajua unachokifanya? Watu wengi huwa wanasahau kwamba marafiki wanaweza kuwa chanzo kizuri sana cha mauzo au kuongezeka kwa idadi ya wateja.Waambie marafiki zako na wao(hususani kama ni marafiki kweli) bila shaka watawaambia marafiki zao pia.

2.Kuwa na tovuti (website)– Katika zama za leo,ni muhimu kwa biashara kuwa na tovuti. Natambua kwamba sio biashara zote zinaweza au zina uwezo wa kuwa na tovuti. Unachotakiwa hapa ni wewe mwenyewe kujiuliza, je aina hii ya biashara niliyonayo inahitaji uwepo wa mtandaoni kupitia tovuti? Ni swali na jibu ambalo wewe mwenyewe sharti ulipatie majibu. Uzuri wa tovuti au uwepo wa mtandaoni ni kwamba hata pale biashara yako inapokuwa imefungwa(usiku kwa mfano kwa biashara za mchana) bado unakuwa unaendelea kuitangaza.

3.Mitandao Jamii Ni Lazima– Sidhani kama natakiwa kusisitiza zaidi jinsi gani ni muhimu kutangaza huduma au bidhaa zako kupitia mitandao jamii kama vile Blogs, Facebook,Twitter,LinkedIn,Google Plus etc. Kama unapenda kuandika,kwa mfano, anzisha blog.Andika,weka video za huduma unazozitoa.Siku hizi kamera nyingi zina uwezo wa kuchukua video.Kwanini usijichukue video ya dakika mbili ukielezea bidhaa au huduma unazozitoa na kutuma mtandaoni kupitia mitandao jamii? Bila shaka marafiki zako watakupata vizuri zaidi na wao wanawapelekea wengine video hiyo.Ujumbe utaenea.


4.Orodhesha Biashara Yako katika Huduma Za Orodha Za Biashara– Hatua muhimu katika biashara ni kutambulika. Njia mojawapo nzuri ya kuchukua au kufikia hatua hii ni pamoja na kujiorodhesha. Kwa mfano,biashara yako inahusiana na mazao ya kilimo.Kama kuna umoja/ushirikiano wa wafanyabiashara wa mazao ya kilimo hakikisha kwamba jina lako na la biashara yako yanakuwepo katika orodha hiyo. Pia katika nchi mbalimbali zipo huduma za kujiorodhesha zinazoitwa Kurasa Za Njano(Yellow Pages). Hakikisha kwamba biashara yako ipo ndani. Pia search engines kama vile Google,Yelp,Yahoo,Bing nk zinazo huduma mbalimbali za kuorodhesha biashara mbalimbali katika nchi. Itumie fursa hiyo. Angalizo: Katika kujiorodhesha kuwa makini,zipo huduma za Bure na Za Kulipia.Kazi Ni Kwako.

5.Tumia Barua Pepe Kutangaza/Kujitangaza-Siku hizi watu wengi wana e-mail address(anuani pepe). Bila shaka hata wewe msomaji unayo.Kwanini basi usiitumie hiyo anuani pepe kuwasiliana na wateja wako?Anapokuja kwenye sehemu yako ya biashara,muombe mteja anuani pepe yake ili panapokuwa na “deal” umtumie.Mara nyingi hakuna atakayekataa. Kila mtu anapenda “deal”.Ukishakuwa na anuani pepe,kwanini usimkumbuke mteja wako aidha kwa “deal” au kumtumia e-card ya X-mas,Eid nk? Angalizo: Usiwatumie wateja wako mambo mengi mengi mara kwa mara.Wanaweza dhani ni spammers na hivyo waka-block kabisa barua pepe kutoka kwako.

6.Gawa Business Cards– Niliwahi kusikia kisa cha jamaa fulani ambaye alitengeneza business cards nzuri sana. Alipoona ni nzuri sana akagoma kuzigawa.Akawa anaenda nazo kwenye mikutano nk lakini hazigawi.Unajua kilichotokea? Biashara ikafa akabaki na business cards zake.Nnachotaka kusema ni kwamba kila fursa inapojitokeza,gawa business cards zako.Na usigawe tu na kutosema kitu.Mwambie kwa maneno machache yule unayempatia business card kuhusu biashara yako. Muombe na yeye akupe business card yake kama anayo. Kwa maneno mengine ukifanya hili unakuwa pia umefanya lile nililolizungumzia mwanzoni kabisa.

7.Shiriki Katika Huduma/Shughuli za Kijamii– Kama mfanyabiashara,njia mojawapo rahisi ya kuifanya jamii ikutambue ni pamoja na kushiriki katika shughuli mbalimbali zinazoendelea katika jamii. Unaweza kushiriki kama mdhamini au mfanyakazi wa kujitolea. Mara nyingi huduma/shughuli hizi za kijamii huwa zinahudhuriwa na watu wa habari(media) na kwa maana hiyo unaweza kuwa umepata “matangazo bila kulipia”. Lakini cha muhimu zaidi ni kwamba unaposhiriki katika shughuli za kijamii ni ishara kwamba unaijali jamii hiyo. Unapofanya hivyo ni rahisi na wewe kuungwa mkono na wana jamii hao.

8.Muombe Mtu(mwandishi,blogger,mtangazaji nk) afanyie mapitio(review) bidhaa yako– Utaratibu huu bado haujaingia sana nchini kwetu.Lakini mimi binafsi naukubali sana. Kama unauza bidhaa fulani na unaamini kwamba bidhaa yako ni bora,utafaidika sana endapo mtu kama mwandishi,blogger,mtangazaji wa televisheni,radio nk,atakapoitumia bidhaa yako,kuona matokeo yake na kisha kwenda hewani na kuwaambia wanaomsikiliza kuhusu bidhaa aliyoitumia. Naomba nisisitize hapa kwamba ni muhimu akawa ameitumia kweli na kupata matokeo anayoyapigia debe.Kinyume chake ni kwamba yeye ataharibu heshima yake na wewe utakuwa umekosa lundo kubwa zaidi la wateja. Angalizo: Kuna waandishi au bloggers na watangazaji nk ambao hawafanyi mapitio BURE..Ongea nao muelewane.

9.Hudhuria na Tumia Vizuri Maonyesho Ya Biashara/Mikutano-Sio kila biashara inaweza kushiriki katika maonyesho ya biashara hususani yale makubwa kama vile Saba Saba au Nane Nane.Lakini yapo maonyesho mengine mbalimbali(mfano kupitia wizara za serikali au umoja fulani wa wafanyabiashara). Kila inapowezekana,usilaze damu.Shiriki.Pia shiriki mikutano mbalimbali inayoandaliwa kwa ajili ya wafanyabiashara fulani. Kwa uzoefu wangu,mikutano ya aina hii ipo na inafanyika mara kadhaa tena bila malipo.Shiriki.Unapokwenda huko beba kadi zako za biashara,vipeperushi nk.Gawa,ongea na wenzako,toa mchango na mawazo yako.

10.Tangaza Kwenye Magazeti,Televisheni,Radio,Blogs Nk: -Miongoni mwa njia/mbinu zote nilizozitaja hapo juu,pengine hii ndio ikawa ya gharama zaidi. Lakini ukweli ni kwamba matangazo,yanalipa kwa maana ya kwamba,kama uwezo upo,basi angalia uwezekano wa kutangaza kupitia njia hizi. Lakini kitu kimoja ambacho ni vizuri kukizingatia hapa ni kwamba unapoamua kutangaza kupitia njia hizi,kuwa mbunifu.Usifanye tu kile ambacho washindani wako wa kibiashara wanafanya. Jaribu kuwa na mawazo huru na binafsi. Pasua kichwa,fikiri.

Imeandaliwa na  John Jonas Kiwovele